Ágætt jafnvægi komið á vatnsbúskapinn
Ágætt jafnvægi er nú komið á vatnsbúskap vatnsveitu Norðurorku á Akureyri og ástandið þokkalegt á Svalbarðsströnd.
Eins og fram hefur komið brugðust notendur á Akureyri mjög skjótt við þegar þeir voru í síðustu viku beðnir að spara kalda vatnið þar sem birgðastaða í miðlunargeymum fór niður fyrir öryggismörk. Er ástæða til að ítreka þakkir til viðskiptavina fyrir þessi góðu viðbrögð.
Eins og staðan er í dag þá er ekki ástæða til þess að óttast vatnsskort en þó ber að hafa í huga að vatnsgæfni aðal vatnslinda Norðurorku í Hlíðarfjalli (Hesjuvallalindir) og í Glerárdal (Sellandslindir) er mun minni en í meðalári og því er þeim tilmælum beint til viðskiptavina að fara almennt sparlega með vatnið. Nægt vatn er á Vöglum í Hörgárdal en því vatni þarf hins vegar að dæla í bæinn með ærnum tilkostnaði og því full ástæða til þess að komast hjá miklum dælingum í lengstu lög.
Einnig ber að hafa í huga að þessa dagana er unnið að endurbótum á hluta af Sellandslindum og því er ekki að koma eins mikið vatn þaðan eins og annars væri.
Hér að neðan má sjá nokkrar myndir frá vinnu við Sellandslindirnar.
