Verndarflokkur, biðflokkur og nýtingarflokkur
Í framhaldi af því að lögð hafa verið fram drög að þingsályktunar-tillögu um niðurröðun virkjunarhugmynda í verndarflokk, biðflokk og nýtingarflokk hafa hagsmunaaðilar verið að rýna tillöguna. Tvö atriði hafa einkum vakið athygli við þessa skoðun á málinu.
Þannig hefur Samorka bent á að miðað við áætlaða orkuvinnslu-getu orkukosta sem fjallað er um í 2. áfanga rammaáætlunar þá geri drögin ráð fyrir að þeir kostir sem falli í nýtingarflokk nemi 11.900 gígavatt stundum (GWh) á ári, 11.000 GWh falli í biðflokk og 13.900 Gwh í verndarflokk. Þá munu orkukostir einnig falla utan flokkunar þar sem þeir eru á friðlýstum svæðum en þar er um 15.100 gígavatt stundir að ræða. Niðurstaða Samorku er því að aðeins um 23% af orkuvinnslugetu þeirra virkjunarkosta sem voru til umfjöllunar í verkefnisstjórn rammáætlunar falli í nýtingarflokk samkvæmt drögunum að þingsályktunartillögunni.
Hitt atriði sem vekur athygli er að ekki er full samvörun milli þeirra hugmynda sem koma fram í þingsályktunartillögunni og niðurstöðu verkefnisstjórnarinnar og því ljóst að skiptar skoðanir munu verða um tillöguna eins og hún nú liggur fyrir. Sem dæmi um þetta má benda á að virkjunarkostir sem voru fremur ofarlega í röðun rammaáætlunar lenda í biðflokki eða jafnvel verndarflokki eins og t.d. Austurengjar, Trölladyngja og Grænidalur.
