Vinnuvernd - allir vinna
Norðurorka hf. varð í október s.l. þess heiðurs aðnjótandi að vera eitt af tólf fyrirtækjum á Íslandi sem tilnefnt var til vinnuverndarverðlaunanna. Í því felst að fyrirtækið sé í hópi þeirra sem eru til fyrirmyndar á þessu sviði.
Af þeim fyrirtækjum sem tilnefnd voru til verðlauna hlutu eftirfarandi fyrirtæki/starfsöðvar viðurkenningu:
- Landsvirkjun vegna Fljótsdalsvirkjunar
- Samherji vegna Reykfisks
- Þjóðminjasafnið
- Mannvit verkfræðistofa
Norðurorka hf. er stolt yfir því að komast í þennan hóp fyrirmyndarfyrirtækja og einnig þakklát Vinnueftirlitinu fyrir að standa að þessum ágætu verðlaunum sem eru fyrirtækjum hvatning í þessum mikilvæga málaflokki.
Í bréfi Vinnueftirlitsins til Norðurorku hf. af þessu tilefni kemur m.a. eftirfarandi fram:
"Vinnueftirlitið þakkar fyrir góðar móttökur og áhugaverða heimsókn í tengslum við að fyrirtæki ykkar var tilnefnt til viðurkenningar vegna fyrirmyndar vinnuverndarstarfs með áherslu á forystu stjórnenda og virkt samstarf við starfmenn.
Eftir matsferlið reyndist mjög mjótt á mununum í flestum tilvikum og samkeppnin því mjög hörð. Ákveðið var horfa til bæði til stærri og minni vinnustaða, fyrirtækja og stofnana og dreifingar á landsvísu. Því reynslan sýnir að jákvæðar fyrirmyndir á sviði vinnuverndar hafa oft mjög jákvæð og hvetjandi áhrif á sínu landssvæði. Öll þessi atriði voru höfð að leiðarljósi þegar komist var að niðurstöðu um hvaða vinnustaðir yrðu fyrir valinu
Þema vikunnar VINNUVERND - ALLIR VINNA er áhersla út árið 2013 og hvetur Vinnueftirlitið ykkur áfram í því góða starfi sem þið eruð að vinna í vinnuvernd."
Norðurorka hf. mun áfram leggja mikla áherslu á vinnuverndarstarf enda er okkur ljóst að því verkefni líkur aldrei, alltaf þarf að standa vaktina þó ekki væri í öðru en að viðhalda góðum árangri og auðvitað má alltaf gera betur.
